Uighurs flex their muscles

لما واحد مجرم وقاطع طريق وبلطجي يفتري على واحد ضعيف، ممكن أقول شفتها قبل كده، قديمه

أما لما يحصل ده ويقوم البلطجي ده كمان يقول إن الضعيف ده بيستقوى عليه وبيفرد عضلاته، يبقى لأه بقى، ده استهبال مركز ومع سبق الإصرار والترصد

ده بالظبط اللي حاصل في الصين

النظام الصيني أغبى منه ما فيش، أسهل حاجه عنده القتل والإعدام، يعني لما وزير يغلط ما فيش حاجه اسمها يترفد، يُعدم على طول، إحنا لسه ها نقيله ونوجع قلبنا

ولما المسلمين في تركستان الشرقية اللي سموها زورا وبهتانا بعد احتلالها شينجيانج -أو الأرض الجديدة- يطالبوا بحقوقهم تُعَلق لهم المشانق، ويبقوا إرهابيين وانفصاليين

مش كده وبس، لا ، دول بينضربوا كمان بالنار في الشوارع على عينك ياتاجر، واللي له شوق في حاجه يبقى يفتح بقه

عرقية الهان الصينية بتبرطع في الإقليم المسلم بالسيوف والأسلحة النارية ولا حد بيقولها بتعملي إيه

المسلمين دخلوا بيوتهم لأن الجيش والشرطة واقفين في ضطر الهان

الحكومة الصينية قطعت النت والتليفونات وخلتها كحلي في الإقليم

يعني اللي جوه مش عارف يسمع صوته للي بره، ولا اللي بره عارف يطمئن على اللي جوه، اللهم إلا بعض التسريبات من هنا وهناك

حتى إحصائيات القتلى والجرحى والمعتقلين ليس لها مصدر إلا الحكومة الصينية

كل ده ممكن أتفهمه، ماهو الكفر ليس بعده ذنب

إنما الفُجْر بقى إن الصين تطلع بعد ده كله وتقول إن الويغور بيستعرضوا عضلاتهم وبيستقووا

آه والله الكلام ده حصل

صحيفة آسيا تايمز الصينية عامله تقرير بعنوان

Uighurs flex their muscles

صراحة دمي محروق جاهز فلم أستطع قراءته كله، ماهو الجواب باين من عنوانه

تعرفوا المشكلة التانية فين؟

في وسائل إعلامنا اللي عامله زي كيس الجوافة، مع احترامنا لكل المحترمين اللي فيها زي كاتب هذا المقال

مش شاطرين إلا في الهيافة، أما وقت الجد بتلاقيهم في عالم تاني، وأحيانا يقفون مدافعين عن العدو، فيكون السهو الأول الذي ينغرس في صدرك ممن كنت تظنهم منك

لما تقرأوا موضوع غلاف مجلة المجلة هاتعرفوا أنا أقصد إيه، المجلة المحترمة بتقول على مسلمي شينجيانج متطرفين وإرهابيين وتبرر للصين ما تفعله بهم بحجة خوفها من 

تخيلوا في عز القمع والدم ده المجلة المحترمة تكتب أي عنوان للموضوع ده؟

انفصاليه والراديكالية بشينج يانغ

يعني عبط مركز، مضاف إليه ثاني أكسيد الاستهبال

اللي يفرسك أكتر إنك تلاقي الصين مظبطها أمورها مع الدول العربية والاتفاقيات معاهم ماشيه زي الإسهال، لما وصل البزنس إلى المدينة المنورة

مدينة النبي فيها شركة صينية بتعمل تجديدات وأتباع النبي بيتقتلوا هناك بأيدٍ صينية

البنى التحتية في أفريقيا قائمة على الشركات الصينية

سجادة الصلاة اللي إحنا بنصلي عليها وبندعي من فوقها على الصينيين جايه من الصين

يعني الواحد بيدعي ويقول يارب عليك بالصينيين الذين صنعوا هذه السجادة التي أصلي عليها

حتى أمريكا اللي ضحكوا علينا وقالوا لنا إنها ها تقف جنبهم باعتهم سريعا لأن الدولار أغلى

وحتى لو عملت أي حاجه ها يبقى من باب الضغط السياسي على الصين في إطار لعبة المصالح

باقي مين؟

تركيا؟.. اتحركت صحيح، بس ممكن إردوغان يعمل إيه لوحده؟

ماهو إحنا بقينا زي الولايا مش شاطرين إلا في الولولة وخلاص

الواحد دمه محروق، ولما بأتنرفز ما بأعرفش أكتب بالفصحى فاستحلموني

ماهو اللي إحنا بنشوفه ده مش شويه، مش عارف هانلاقيها من ولاد الـ .. اللي بره، ولا من ولاد الـ.. اللي جوه

مش كفايه اللي إحنا فيه، لقد اتسع خرقنا على الراقع، وبلغ السيل الزبى وتجاوز الحزام الطبيين

كفايه كده لا أحسن أنا شكلي ها أغلط، وأنا مش عاوز أزعل حد مني

ملحوظة: الموضوع ده مش جديد

تصبحوا على ... أي حاجه