تخاريف جلال عامر واصطباحة بلال فضل

بقى لي فترة مش طويلة كل يوم لازم أعدي على موقع صحيفة المصري اليوم (اللي بأكرهها كره العمى) علشان أشوف تخاريف جلال عامر ، وكمان أعدي علي اصطباحة بلال فضل
نصيحتي لأي حد عاوز يجرب هذه الطقوس أن يبدأ باصطباحة بلال ثم يعدي على تخاريف جلال، لأن الواحد لما بيقرأ لجلال عامر يشعر إنه مش قادر يقرأ لحد تاني في الدنيا، وقد وجدتُ أحد المعجبين بالرجل يحذر القراء الجدد من أن القراءة لجلال عامر يوميًا تعد نوعاً من أنواع "التعاطي "وفقاً لـ "التكييف" القانوني لـ "الإدمان
ملحوظة: أحاول الالتزام بنصيحة البدء بالاصطباحة ثم الانتقال للتخاريف، لكني لا أستطيع أن أمنع نفسي من الهرولة إلى التخاريف فور وصولي إلى صفحة المصري اليوم الرئيسية، لذلك أظلم اصطباحة بلال
مش عارف بيت شعر المتنبي بيلح على دماغي دلوقتي ليه
وكم ذا بمصر من المضحكات **** و لكنه ضحك كالبـكـاء
يمكن لأنه بيلخص السبب اللي بيشدني لكلام جلال عامر، اللي هوه نفس السبب اللي بيخلي المصريين أكتر شعب بيقول نكت رغم إنه أكبر شعب مطحون على وجه الأرض

أو ربما لم أعد هذا المتفائل الذي يرى الدنيا ربيعًا حتى وهي تبرق وترعد

منه لله اللي كان السبب