اسم مصر

في أحد المحاضرات للدكتور وجدي الفيشاوي بكلية اللغات والترجمة قسم الترجمة الفورية منذ سنوات، بدرت من أحد زملائنا إشارة سخرية من (مصر)، في معرض انتقاده لأمر لا أذكره، وكان الرد الذي نحت في قلبي شيئًا لن يُذهبه شيء من الدكتور وجدي، أن قال: مصر ماتستاهلش منكم إنكم تشتموها، إوعوا تعملوا كده، المشكلة مش في البلد المشكلة فينا إحنا، وإن كان فيه ناس مش كويسين فكله بيروح أما البلد دي فهاتفضل رغم كل شيء

الدكتور وجدي لم يكن من هؤلاء الذين يُنَظِّرون وفقط ويرفعون شعارات واقعهم أبعد ما يكون عنها، بل ضرب لنا القدوة العملية قبل أن يتكلم بكلمة، حينما رأينا علمه الغزير، وشاهدنا كيف كان لا يتلقى جنيهًا واحدًا مقابل كتبه التي أعطاها لنا -وإن فعل فهذا عين حقه-وطلب منا إن شئنا- بعدما حادثناه بشأن مستحقاته عن هذه الكتب، ولو ثمن الطباعة- أن نضع بعض التبرعات لحساب مستشفى السرطان التي كانت في بداية تأسيسها

لما بأفتكر أساتذتي دول تعتريني رغبة في تقبيل أيديهم ورؤوسهم، فهم قبل أن يعلمونا الترجمة وفنونها، علمونا الحياة وآدابها

لا أملُّ من القول إننا كنا محظوظون بأمثالهم، في هذا العالم الذي اختفت فيه القيم وتقزم فيه الرجال

تعرفوا كمان إن دول اللي المفروض يُكرموا بجد من الدولة ويُرفع ذكرهم في العالمين، مش الطبالين وحرامية الشهادات

حُقَّ لي أن أفخر أنني جلستُ بين يدي هؤلاء، ومن حاز مثل هذا الشرف فلينازلني

وفاءً لما علمتمونا إياه، سنظل نحب هذا البلد حتى نلقى الله

ولن نسمح لأحد أن يلوث

اسم مصر

على اسم مصر التاريخ يقدر يقول ما شاء
أنا مصر عندي أحب وأجمل الأشياء
بحبها وهي مالكة الأرض شرق وغرب
وبحبها وهي مرمية جريحة حرب
بحبها بعنف وبرقة وعلى استحياء
وأكرهها وألعن أبوها بعشق زي الداء
وأسيبها وأطفش في درب وتبقى هي فـ درب
وتلتفت تلاقيني جنبها في الكرب
والنبض ينفض عروقي بألف نغمة وضرب
على اسم مصر
مصر النسيم في الليالي وبياعين الفل
ومرايه بهتانة ع القهوة .. أزورها .. وأطل
القى النديم طل من مطرح منا طليت
والقاها برواز معلق عندنا في البيت
فيه القمر مصطفى كامل حبيب الكل
المصري باشا بشواربه اللي ما عرفوا الذل
ومصر فوق في الفراندة واسمها جولييت
ولما جيت بعد روميو بربع قرن بكيت
ومسحت دموعي في كمي ومن ساعتها وعيت
على اسم مصر
أنا اللي اسمي حتحـور .. أنا بنت رع
مثـال الأمـومـة ورمـز الحـنـان
تفـيض حـلمـاتي وتمـلا الـتـرع
وتسـقـي البـشـر كلهـم والغـيـطان
نهايته يا مصر اللي كانت أصبحت وخلاص
تمثال بديع وانفه في الطين غاص
وناس من البدو شدوا عليه حبال الخيش
والقرص رع العظيم بقى صاج خبيز للعيش
وساق محارب قديم مبتورة فأبو قرقاص
ما تعرف اللي بترها سيف والا رصاص
والا الخراب اللي صاب عقل البلد بالطيش
قال ابن خلدون أمم متفسخة تعيش ليش
وحصان صهل صحى جميع الجيش
على اسم مصر
النخل في العالي والنيل ماشي طوالي
معكوسة فيه الصـور .. مقلوبة وأنا مالي
يا ولاد أنا فـ حالي زي النقش في العواميد
زي الهلال اللي فوق مدنة بنوها عبيد
وزي باقي العبيد باجري على عيالي
باجري وخطوي وئيد من تقل أحمالي
محنيه قامتي .. وهامتي كأن فيها حديد
وعينيا رمل العريش فيها وملح رشيد
لكني بافتحها زي اللي اتولدت من جديد
على اسم مصر
مصر .. التلات أحرف الساكنة اللي شاحنة ضجيج

زوم الهوا وطقش موج البحر لما يهيج

وعجيج حوافر خيول بتجر زغروطة

حزمة نغم صعب داخلة مسامعي مقروطة

في مسامي مضغوطه مع دمي لها تعاريج

ترع وقنوات سقت من جسمي كل نسيج

وجميع خيوط النسيج على نبرة مربوطة

أسمعها مهموسة والا أسمعها مشخوطة

شبكة رادار قلبي جوه ضلوعي مضبوطة

على اسم مصر

وترن من تاني نفس النبرة في وداني

ومؤشر الفرحة يتحرك في وجداني

وأغاني واحشاني باتذكرها ما لهاش عد

فيه شيء حصل أو بيحصل أو حيحصل جد

أو ربما الأمر حالة وجد

واخداني انا اللي ياما الهوى جابني ووداني

وكلام على لساني جاني لابد أقوله لحد

القمح ليه اسمه قمح اليوم وأمس وغد

ومصر يحرم عليها .. والجدال يشتد

على اسم مصر

الله عليك يا صلاح يا جاهين